港币5毫同100円日元,虽然两者睇落风马牛不相及,但却因为佢哋硬币嘅大细同厚薄都差唔多,竟畀人当做「通用货币」咁用。事源近日网络流传有日本杂货店贴出告示,上面贴有港币5毫嘅正反面,呼吁扭蛋客「Do not use this coin(唔好用港币5毫代替日元100円扭蛋)」。

日本杂货店贴出嘅一张小小告示,重复咗两次「do not use(唔准用)」、「can not use(唔可以用)」,亦附上港币5毫,表示对有人用5毫代替100円扭蛋一事,感到「Very annoying(好烦扰)」。根据汇率,100円日元约等于$7.05港币,相比用5毫扭蛋,价钱足足相差13倍。

另一张由网民贴出嘅对比图显示,5毫同100円嘅大细同厚薄,真系几乎一模一样,有可能会令投币机器混淆,但原来早喺10几年前,已经有人用5毫代替100円投币。有网媒翻出一篇2004年嘅日本报道,指于新宿一个储物柜场发现多达40个港币5毫,涉嫌有人用作代替100円投币;亦有网民话早于80年代尾,「已经有香港人喺日本用五毫入汽水机」。

对于有人用5毫代替100円扭蛋,有网民认为,杂货店应该唔系第一次发现有人咁做,称「如果得几次,唔会咁样标示出嚟」,亦有人话未必系香港人所为:「唔畀系日本人自己咩?任何人都有可能啦」,不过都有网民话,只要有香港人丑出国际,都会有人辩称事主非「纯正香港人」或者系「新香港人」,批评香港人「个心仲玻璃过大陆人」。

网民留言:

Charles Tang:香港好多人都觉得自己好聪明好醒,完全唔觉得有问题
梁天来:奇在做这种行为的人平日把口非常之崇日
Hoo Karl:笑咗,原来港币系得香港人先准许持有
Ching Ho Lam:香港人一向都醒!出咗事重可以入新香港人数
Yick Yick Yick:几十蚊游日本不是梦